കൊച്ചി: വിദേശത്ത് ജോലിയിൽ പ്രവേശിക്കുന്നതിനായി ജാമ്യവ്യവസ്ഥയിൽ ഇളവ് തേടിയ മുൻ ഡിജിപി ടോമിൻ ജെ. തച്ചങ്കരിക്കെതിരെ രൂക്ഷമായ വാക്കാലുള്ള പരാമർശങ്ങളുമായി കേരള ഹൈക്കോടതി. അനധികൃത സ്വത്തുസമ്പാദനക്കേസിൽ ശിക്ഷിക്കപ്പെട്ടതിനെത്തുടർന്ന് രോഗങ്ങൾ ചൂണ്ടിക്കാട്ടി ആശുപത്രിയിൽ കഴിഞ്ഞ തച്ചങ്കരി, ഇപ്പോൾ വിദേശത്ത് ജോലി ചെയ്യാൻ അനുമതി തേടുന്നതിനെ ജസ്റ്റിസ് എ. ബദറുദ്ദീൻ ചോദ്യം ചെയ്തു.
നാലുവർഷം തടവും 30.8 ലക്ഷം രൂപ പിഴയുമാണ് കേസിൽ തച്ചങ്കരിക്ക് വിധിച്ചിരുന്നത്. ശിക്ഷാവിധിക്ക് നാലാഴ്ചയ്ക്കുശേഷം ഹൈക്കോടതി ശിക്ഷ നടപ്പാക്കുന്നത് സസ്‌പെൻഡ് ചെയ്തിരുന്നു. തുടർന്ന് വിദേശത്ത് ജോലിയിൽ പ്രവേശിക്കാൻ അനുവദിക്കണമെന്നാവശ്യപ്പെട്ടാണ് അദ്ദേഹം കോടതിയെ സമീപിച്ചത്.
കസ്റ്റഡിയിലായിരുന്ന കാലയളവിൽ ഒരു ദിവസംപോലും ജയിലിൽ കഴിയാതെ ആശുപത്രിയിൽ തുടർന്ന സാഹചര്യത്തിൽ, വിദേശത്ത് പോയി ജോലി ചെയ്യാൻ എങ്ങനെ കഴിയുമെന്ന് കോടതി വാക്കാൽ ആരാഞ്ഞു. ഇത്തരം കാര്യങ്ങൾ ഗൗരവത്തോടെ പരിഗണിക്കുമെന്നും സാഹചര്യം ഇതാണെങ്കിൽ ജാമ്യം റദ്ദാക്കുന്നതും പരിഗണിക്കേണ്ടിവരുമെന്നും കോടതി മുന്നറിയിപ്പ് നൽകി.
തച്ചങ്കരി കസ്റ്റഡിയിൽ കഴിഞ്ഞ കാലത്ത് എത്ര ദിവസം ആശുപത്രിയിൽ ചികിത്സയിലായിരുന്നുവെന്ന് വ്യക്തമാക്കുന്ന റിപ്പോർട്ട് ജയിൽ സൂപ്രണ്ടിനോട് കോടതി നേരത്തേ ആവശ്യപ്പെട്ടിരുന്നു. നവംബർ ആറിന് ഹർജി പരിഗണിച്ചപ്പോൾ ഈ റിപ്പോർട്ട് കോടതിയിൽ സമർപ്പിച്ചു.
മെഡിക്കൽ രേഖകളും ജയിൽ സൂപ്രണ്ടിന്റെ റിപ്പോർട്ടും പരിശോധിച്ചശേഷം വിശദമായ വാദം കേൾക്കേണ്ടതുണ്ടെന്ന് കോടതി വ്യക്തമാക്കി. ഹർജി നവംബർ 12 വ്യാഴാഴ്ച വീണ്ടും പരിഗണിക്കും. ജാമ്യം റദ്ദാക്കുന്നതുസംബന്ധിച്ച് കോടതി വാക്കാലുള്ള മുന്നറിയിപ്പാണ് നൽകിയത്; ജാമ്യം റദ്ദാക്കി ഉത്തരവിട്ടിട്ടില്ല.